In die daaropvolgende maande is hard gewerk en op Woensdag 24 September 2025, op Erfenisdag, het die gemeenskap van Vryheid die heroopstelling van die museum feestelik gevier.  Wat komiteevoorsitter André van Ellinckhuyzen en sy span binne 18 maande vermag het, is merkwaardig, aangesien die komiteelede dié projek vrywillig onderneem het en ook in ander beroepe staan. 

Die 1885 Nieuwe Republiek Museum het ’n interessante geskiedenis. Die Nieuwe Republiek het bestaan van 1884 tot 1888. Dit is gestig op grondgebied wat as beloning deur die Zulukoning, Dinizulu, aan ’n groep boerevrywilligers uit die Zuid Afrikaanse Republiek geskenk is, nadat hulle hom gehelp het om orde in Zululand te herstel en sy gesag te bevestig. Op 16 Augustus 1884 het Dinizulu ’n proklamasie uitgevaardig waarvolgens 1 355 000 morge (1 160 600 hektaar) aan die boerevrywilligers afgestaan is. 

Die Nieuwe Republiek, onder sy president Lucas Meyer, is deur die Britse owerheid erken. ’n Grondwet is opgestel, ’n volksraad met 12 lede is saamgestel en die dorp Vryheid, gestig in Desember 1884, was die hoofstad. Die bouwerk aan ’n raadsaal, wat vandag die 1885 Nieuwe Republiek Museum huisves, het begin in November 1884. Die gebou, nie veel groter as ’n woonhuis uit die laat 1800s-era nie, het ook gedien as staatskantore, landdroskantoor, kantoor van die staatssekretaris, hof van heemrade, registrateur van aktes en poskantoor. Dit was ook die hooggeregshof waar advokaat de Korte as regter gedien het vir die aanhoor van die eerste moordsaak in Vryheid. Die somber voorkoms van die dik klipmure en selle aan die agterkant van die raadsaal, dien as herinnering dat die gebou ook as gevangenis en fort gedien het.