En wat die skoner geslag betref, hulle is almal reeds getroud of oorsee, sê hy. Sy eksmeisie het Dina se boek gelees en so het hy van Dina te hore gekom.

Ds. Fritz Olivier (52) van die Newcastle-gemeenskapskerk, sê hy het betrokke geraak nadat Dina (die hele dorp ken haar) hom genader het.

Hulle, as geestelike leiers, het al lankal die gevoel dat daar eenheid in die dorp moet wees en dat hulle meer dinge saam moet aanpak. Hulle is die jonger geslag predikante en hy voel die tyd is ryp vir meer samewerking.

“Ek beskou myself egter nie as jonk nie en is seker die oudste van die jongklomp,” sê hy.

Hy dink die kerssangdiens is ’n wonderlike gedagte. Hulle as predikante sien die nood in die dorp raak wat tans ’n ekonomiese laagtepunt bereik het. Die ekonomiese probleme het ’n hele rimpeleffek. “As ’n ingenieur sy werk verloor, kry die kafeetjie op die hoek ook swaar.”

Kerke gaan uit die aard van die saak ook minder bydraes kry terwyl hulle meer behoeftes moet aanspreek.

Pastoor Dustin Fergusson van Bridge Church, het ’n ellelange baard wat hy vir vier jaar lank sedert die einde van die pandemie nie geskeer het nie. Sy bynaam is “Moses.”

Hy vertel dat hy Dina se inisiatief 100 persent ondersteun.

“Ons gemeenskap het dit nodig. Newcastle kry swaar en ek het volle begrip daarvoor dat die dorp geld nodig het om te oorleef en dat dit ook nodig is om ons geestelike lewe ’n hupstoot te gee. Dis ’n seëning om saam te aanbid. Hierdie is ’n pragtige wyse vir die gemeenskap om by mekaar uit te kom. Dina het ’n wonderlike netwerk van mense.”

Ds. Ignatius Rademeyer (45) van die Bergsig NG Kerk het minder as 3 maande gelede Newcastle toe getrek en het dadelik ingestem om die geleentheid by te woon toe hy Dina ontmoet het. Ook hy dink dis ’n wonderlike gemeenskapsprojek.

Die vers wat by hom opgekom het was Jesaja 9 vers 5 wat lui: “Want vir ons is ’n Seun gebore, ’n Seun gegee en Hy sal heers en Hy sal genoem word Wonderbaar, Raadsman, Magtige God. Ewige Vader. Vredevors. Sy heerskappy sal uitbrei. Hy sal op die troon van Dawid sit en oor sy koninkryk regeer. Hy sal die Koninkryk vestig en in stand hou deur reg en geregtigheid van nou af en vir altyd.”

Hy het gesê dat Jesaja 8 eeue voor Christus se koms reeds voorspel het dat Hy sou kom. Met Kersfees word ons daaraan herinner dat ons Skepper weer kom en dat Hy ons kom haal.

Thinus het gesê die geregtigheid van God is so besonders want dit is wie God is.

“Hy is regverdig en hy is volkome en volmaak. Die geregtigheid van God word in die Evangelie aan ons openbaar. Hoe kry die mens wat hom van God vervreem het weer deel aan die geregtigheid? Die ou kerkhervormer Martin Luther, het gesukkel met die gedagte.

“Hoe kan ék God wat regverdig is, werklik dien?

“Hoe kan ek met my dade en my geregtigheid by Sy standaarde uitkom? Hy het vir jare gesukkel tot hy besef het dis nie jou geregtigheid nie maar God se geregtigheid wat vir jou gegee word. En dit het vir hom die poorte van die hemel laat oopgaan. Deur geloof alleen, met ander woorde op geen ander manier as om te glo aan Jesus Christus nie, die Een wat vir ons gebore is en die Een wat vir ons aan die kruis betaal het.”

’n Jeugleraar, Rudolf Vermaak (18) van AGS-Deo, het vertel dat Jesus die ongelooflikste geskenk aan ons is en dat Kersfees steeds vandag voortduur.

“Hoop is aan ons in ’n menslike gedaante gegee.”